Parathënie

    Vështirësia e hartimit korrekt të një Projekt Propozimi në përputhje me disa standarte dhe norma të Donatorëve europianë dhe joeuropianë është ndjerë ndër vite prej të gjithë atyre që janë marrë me hartim dhe menaxhim Projektesh.
Shumë përpjekje janë bërë, mjaft trajnime janë marrë nga nivele të ndryshme si të shoqërisë civile ashtu edhe të pushtetit vendor, por ajo që ka munguar deri më tash është materiali në shqip, i përpunuar dhe i përgatitur për të orientuar dhe udhëhequr proçesin e hartimit dhe menaxhimit të Projektit apo Programit dhe pse jo edhe të Politikave.
    Prej vitesh Fondacioni Shqiptar i Shoqërisë Civile është angazhuar në rritjen e kapaciteteve të OJF-ve në të gjithë vendin dhe ka një eksperiencë në këtë drejtim. Materiale të shkruara janë përgatitur dhe iu janë shpërndarë pjesëmarësve në trajnime në formën e fotokopjeve. Sigurisht në të gjithë këtë proçes ne jemi ndeshur me vështirësi dhe sugjerime të ndryshme prej pjesëmarrësve.
     Duke filluar nga viti i kaluar, ne po zhvillojmë edhe rritje të kapaciteteve të autoriteteve vendore. Ishin pikërisht këto aktivitete që na rivunë në kontakt me Znj. Lis JESPERSSEN, një bashkëpuntore e vjetër e FSHSHC-së, e cila na kërkoi për të përgatitur një sesion të shkurtër trajnimi për një pjesë të stafit të Ministrisë së Ekonomisë në lidhje me Menaxhimin e Ciklit të Projekteve, Programeve dhe të Politikave. Pikërisht prej këtij trajnimi doli edhe kërkesa për të patur një material të shkruar kompakt në formën e një libri për të ndihmuar të gjithë ata që punojnë dhe duan të punojnë në këto drejtime.
Mbështetja financiare e Ambasadës së Mbretërisë së Danimarkës bëri të mundur përgatitjen e këtij materiali të cilin ne po e paraqesim nëpërmjet këtij botimi.
     I gjithë materiali përmban dy pjesë të përfshira në një libër të vetëm: Menaxhimi i Ciklit të Projektit dhe Metoda e Kornizës Logjike.
Ky material është konceptuar dhe shkruar në formën e një manuali, d.m.th. një material praktik udhëheqës në dhënien e njohurive themelore dhe të rrugës që duhet ndjekur për të hartuar një Projekt Program zhvillimi sa më logjik dhe në përputhje me kërkesat e donatorëve qofshin këto europianë ose joeuropianë.
      Metodologjia e përdorur mundëson një kuptim jo të vështirë dhe shfrytëzim praktik të materialit. Gjithçka e përfshirë në këtë botim synon që t'i vijë në ndihmë konkrete lexuesit. Pjesa e dytë jep një përshkrim me të hollësishëm të Metodës së Kornizës Logjike. Kjo teme është prekur edhe në pjesën e parë të librit, por në mënyrë më të përmbledhur. Një përsëritje e tillë nuk e dëmton vlerën e trajtimit veçmas të Metodës së Kornizës Logjike. Ne jemi të ndërgjegjshëm se ky manual përbën një ndihmesë për të gjithë ata_ që do të merren me hartim Projektesh apo Programesh zhvillimi të çfarëdo niveli qofshin. Metoda logjike që mbizotëron synan të forcojë pikërisht këtë aspekt në këtë këndvështrim gjatë gjithë proçesit të hartimit të Projekteve/Programeve.
      Në libër janë dhënë dhe referenca të literaturës së përdorur, të cilës lexuesi mund ti drejtohet në të ardhmen për më shumë hollësi.

Pandeli Theodhori
Drejtor Ekzekutiv
F.SH.SH.C.