HYRJE NË KONCEPTET E SHOQËRISË CIVILE

    Shoqëria Civile nënkupton një koncept shumë të gjerë, i cili në thelb shpreh pjesëmarrjen aktive të individit për të zgjeruar dhe konsiliduar liritë dhe të drejtat e njerëzve, kontributin e tij për një shoqëri të hapur dhe të drejtë, që frymëzon solidaritet, humanizëm, tolerancë dhe mirëkuptim, të cilat janë aq të domosdoshme për vendin tonë në këtë fazë tranzicioni të vështirë dhe të zgjatur.
    Problemet që lidhen me Shoqërinë Civile janë trajtuar nga autorë e studiues të shumtë në këndvështrime të ndryshme.Gjenealogjia e këtij koncepti është e hershme. Termi është trashëguar nga romakët, të cilët flisnin për “societas civilis”… Origjina e vërtetë e Shoqërisë Civile është në Anglinë dhe Evropën Perëndimore të shekullit të 17-të. Filozofi Xhon Loch përdorte termin shoqëri civile, por jo në kuptimin modern të saj, përderisa ai nuk e dallonte atë nga shteti. Megjithatë Lock ndërmori hapin esencial për të dalluar rregullat politike nga “komuniteti” që është shoqëria.
    Duke iu referuar fjalorëve të shumtë, termin “Shoqëri Civile” e gjejmë të shpjeguar gjerësisht. Në një kuptim “civile” do të thotë “që u përket qytetarëve apo bashkësisë së qytetarëve”. Në konceptin juridik “civile” do të thotë “që ka të bëjë me të drejtat private të individëve dhe me veprimet ligjore që rrjedhin nga këto të drejta private”.
    Në kuptimin e zakonshëm me term “civil” nënkuptohet një person pa pushtet zyrtar apo ushtarak. Termi “civil” ose “i civilizuar” i referohet gjithashtu një individi të kulturuar, të sjellshëm.
    Ashtu siç shprehet studiuesi Aaron Rhoder “Shoqëria Civile”, në kuptimin e një shoqërie që karakterizohet nga qëndrimet e qytetëruara, do të thotë një shoqëri që udhëhiqet nga vlerat themelore të drejtësisë e ndershmërisë, tolerancës, zbatimit të rregullave demokratike – një shoqëri vetërregulluese në të cilën rendi buron nga respektimi pozitiv i vlerave të përbashkëta, jo nga nënshtrimi ndaj pushtetit shtetëror”. Etj…….