HYRJE

    Udhëzuesi për Organizatat Joqeveritare është i pari i llojit të vet dhe është një material që u vjen në ndihmë të gjitha shoqatave, që veprojnë në vendin tonë. Në të janë përfshirë tema, çështje dhe probleme, të cilat organizatat janë të interesuara në veprimtarinë e tyre të përditshme. Autorët e Udhëzuesit janë përpjekur t'u përgjigjen shoqatave sa më mirë dhe qartë, me një material të shkruar, lidhur me nevojat që ato kanë paraqitur gjatë takimeve, vëzhgimeve me pyetsorë, seminareve dhe diskutimeve në grupe të vogla pune, të cilat janë zhvilluar gjatë tri viteve të fundit pranë Fondacionit Shqiptar të Shoqërisë Civile,Forumit Shqiptar të OJF-ve dhe shumë organizatave të tjera.
    Nevoja për të pasur një libër të tillë ka dalë pra pothuajse nga të gjitha organizatat, si ato me eksperiencë, ashtu edhe nga ato që sapo janë krijuar.
    Ndonëse ky udhëzues plotëson një boshllëk për materiale që u vinë në ndihmë organizatave joqeveritare, nuk pretendojmë që ky botim është i përkryer dhe u përgjigjet gjithë nevojave të OJF-ve.
    E ndjej për detyrë të përshëndes të gjithë anëtarët e shoqatave, organizatave, grupeve dhe veprimtarive, të cilat ndihmuan për identifikimin e çështjeve me të rëndësishme dhe që ishin të interesuar që ky material të pasqyrojë sa më mirë zhvillimin e sektorit të tretë në Shqipëri.
      Në hartimin e Udhëzuesit u angazhuan ekspertë të trainuar gjatë viteve të fundit në mjaft kurse trainimi dhe seminare ndërkombëtare, të cilët, krahas ekspertizës, sollën dhe eksperiencën e fituar nga kontaktet e drejtëpërdrejta me Organizatat Joqeveritare Shqiptare si dhe atë të fituar gjatë punës me to.
      Botimi i Udhëzuesit për OJQ-të u mundësua në kuadrin e projektit të Fondacionit Amerikan Charles Stweart Mott të realizuar nga FSHSHC. Me këtë rast falenderojmë drejtuesit e Fondacionit Mott dhe Qeverinë Daneze që bashkëpunuan për trainimin e specialistëve të OJQ-ve nga 12 rrethe të vendit tonë dhe finalizimin e këtij trainimi me një Udhëzues Pune për OJQ-të.
       Synimi ynë është që organizatat jo qeveritare të përmirësojnë cilësinë e punës së tyre, për të qënë në gjendje të thithin fonde nga donatorët dhe përkrahësit e zhvillimit të shpejtë të Shqipërisë.

Tiranë, Korrik 1998

Prof.Dr.Rolanda Dhimitri
Drejtore Ekzekutive e FSHSHC